Lea Ypi,Shqiptarja e parè qe bèhet pjesè e Akademisè Britanike.

Lea Ypi, Shqiptarja E parë që bëhet pjesë e Akademisë Britanike

Nga

Anila Kadija

08:32 | 18/07/2024

Në historinë e Akademisë Britanike, për herë të parë një shqiptare është pranuar në radhët e saj: intelektualja dhe profesoresha Lea Ypi. Ky është një moment historik për komunitetin shqiptar dhe një arritje e rëndësishme për vetë Ypin, e cila është njohur dhe vlerësuar për punën e saj të jashtëzakonshme në shkencat humane dhe shoqërore.

Puna e femrës shqiptare në Mbretërinë e Bashkuar kurorëzohet gjithmonë me vendin që ajo meriton. Është aq kënaqësi sa edhe krenari që një përfaqësim i këtij niveli të lartë e bën profilin e intelektuales shqiptare në botë një frymëzim edhe për brezat.

Akademia Britanike ka zgjedhur 86 studiues kryesorë nga fusha të ndryshme për të qenë pjesë e Fellowship të saj këtë vit. Nga këta anëtarë të rinj, 52 u zgjodhën nga 21 universitete në të gjithë Mbretërinë e Bashkuar, ndërsa 30 Fellows Ndërkombëtarë u zgjodhën nga universitete të tjera në botë, përfshirë SHBA-në, Kanadanë, Afrikën e Jugut, Japoninë, Kinën, Australinë, Tajvanin, Zvicrën, Gjermaninë, Italinë, Holandën, Turqinë dhe Izraelin. Gjithashtu, Akademia zgjodhi katër Anëtarë Nderi nga bota e artit, letërsisë, gazetarisë dhe filmit.

Lea Ypi është një personazh tejet i diskutuar kohët e fundit. Natyra e saj e qetë i jep një përkufizim çdo diskutimi në mënyrën më origjinale dhe të vërtetë. Ajo ka të gjitha karakteristikat e një gruaje shqiptare me diapazon, e brumosur nga shumë kultura, duke udhëtuar në ekuilibër midis sintonive njerëzore, si në punë, me penën e saj, ashtu edhe në jetën e përditshme. Hapësirat bosh i mbush me kryeneçësinë e studiueses, por me këmbë në tokë. Është e çiltër dhe bujare në shprehjen e lirisë së veprimit dhe të mendimit, pa krijuar konflikte. Duke më besuar shpesh copëza dorëshkrimi nga libri i saj dhe duke më bërë pjesë të veprës së saj nëpërmjet diskutimeve me pikëpamje herë të njëjta dhe herë të ndryshme, u përfshiva në entuziazmin e një mendjeje të hapur, siç është edhe ajo vetë. Seç ka një veçanti stili i saj, të cilin ajo e përdor lirshëm, pa sajuar apo ngushtuar me çdo kusht konturet e së vërtetës, ashtu siç ajo e ka përjetuar: pa paragjykim, pa drojë, pa frikë dhe me dashuri prej fëmije e të rriture tashmë.

E njohur me librin i saj “Free” i karakterizuar nga timbri i lirë i shpirtit dhe dinjitetit, kur nuk ishim të lirë. Kjo është e vërteta e saj! Lea është një docente profesoreshë e teorisë politike në “London School of Economics”(LSE). Përveç librit në fjalë, i cili është botuar nga shtëpia botuese “Penguin London” e më pas në shqip nga shtëpia botuese “Dudaj” dhe është përkthyer e botuar nga një sërë shtëpish botuese në shumë shtete, ka nxjerrë edhe librat “The meaning of the partisanship” dhe “The architectonic of reason” të botuara nga Oxford University Press. Konceptin e lirisë dhe për luftën e vazhdueshme me të cilën përballet çdo ditë një grua në karrierë, të cilat ajo i njeh mirë, e ka shpërndarë gjithmonë me frymën e lirë në shumë auditore të niveleve të larta ndërkombëtare ku është mirëpritur dhe duartrokitur me onoret e merituara.