Shpresa e Dijes – Zëri që Ndriçon Brezat

Shpresa e Dijes – Zëri që Ndriçon Brezat

Në një kohë kur bota ka nevojë për më shumë gra lidere, më shumë zëra të dijes dhe më shumë shembuj frymëzues, Shqipëria ka fatin të ketë një figurë që mishëron të gjitha këto: Prof. Dr. Shpresa Delija. Si pedagoge e gjuhëve të huaja me një karrierë që shtrihet përgjatë pesë dekadave, ajo është një prej personaliteteve më të respektuara në arsimin shqiptar. Përkushtimi i saj ndaj edukimit, fuqizimit të gruas dhe humanizmit e ka bërë atë një figurë të spikatur dhe një model frymëzimi për breza të tërë studentësh dhe kolegësh.

Nga auditorët e Fakultetit të Gjuhëve të Huaja në Universitetin e Tiranës deri te forumet ndërkombëtare dhe projektet europiane, nga themelimi i hapësirave burimore për mësuesit e ardhshëm deri te promovimi i shëndetit mendor dhe artit si mjete fuqizimi, Prof. Dr. Shpresa Delija ka qenë gjithmonë aty ku dija ka pasur nevojë për një zë të fortë, por të urtë. Nderimet e shumta ndërkombëtare, si “Global Humanitarian of the Year” dhe “Phoenix Women’s Excellence Award 2025 Nominee”, nuk janë gjë tjetër veçse pasqyrë e një jete të jetuar në shërbim të njerëzimit dhe edukimit.

Shpresa e Dijes – Zëri që Ndriçon Brezat

***

Intervistë me Prof. Dr. Shpresa Delija – Zëri që Ndriçon Brezat

1. Na flisni për rrënjët tuaja dhe vlerat që ju kanë formuar si grua vizionare dhe pedagoge.

Përgjigje.

Unë vij nga një familje intelektuale dhe e thjeshtë, me babanë mësues dhe nënën edukatore. Në familje mësoja dashurinë për arsimin dhe respektin, duke u rritur në një ambient ku roli i mësueses ishte pjesë e lojës dhe ëndrrës sime, që më vonë u bë mision jetësor.

2. Cilat janë momentet më domethënëse në karrierën tuaj në Fakultetin e Gjuhëve të Huaja?

Përgjigje

Katër dekada pune, ku sfida më e madhe ishte të punoja si mësuese në Lezhë dhe më pas në universitet, duke balancuar detyrat familjare dhe profesionale. Mbështetja e familjes dhe dashuria për studentët kanë qenë shtylla kryesore të suksesit tim.

3. Si e shihni rolin tuaj në formimin e magjistratëve përmes anglishtes ligjore?

Pergjigje.

Bursa TEMPUs në Mbretërinë e Bashkuar më dha mundësinë të aftësohem në anglishten ligjore dhe të kontribuoj në përmirësimin e programeve të Shkollës së Magjistraturës. Kam dhënë mësim mbi 15 vjet, duke ndihmuar magjistratët të jenë konkurrues në nivel europian.

4. Cili ishte vizioni juaj si presidente e ELTA Albania dhe si e ngritët këtë organizatë?

Pergjigje.

Qëllimi ishte promovimi dhe motivimi i mësuesve të anglishtes në Shqipëri dhe krijimi i mundësive për bashkëpunim ndërkombëtar. Organizova trajnime dhe konferenca rajonale, duke krijuar një familje të bashkuar mësuesish dhe duke sjellë çmime ndërkombëtare.

5. Çfarë ndikimi kanë pasur projektet europiane në arsimin shqiptar?

Pergjigje.

Bashkëpunimi në projekte Erasmus dhe të tjera europiane ka ndihmuar për të modernizuar sistemin e arsimit të lartë dhe për ta afruar atë me standardet europiane përmes trajtimeve dhe shkëmbimeve me universitete të vendeve të Ballkanit dhe më gjerë.

6. Çfarë do të thotë për ju kontributi në Portofolin Evropian të Gjuhëve?

Përgjigje.

Ky projekt i miratuar në Strasburg në 2009 është një sukses që i mëson studentët të jenë të përgjegjshëm dhe të pavarur në procesin e të nxënit të gjuhëve të huaja, duke promovuar vlerat dhe kulturat e tyre.

7. Si lindi ideja e Auditorit Burimor për studentët-mësues dhe çfarë plotëson ai?

Përgjigje.

Nga nevoja e studentëve për një hapësirë ku ndihen të vlerësuar dhe ku praktikojnë teorinë në mësimdhënie. Është një ambient modern me teknologji dhe literaturë të specializuar që ndihmon në zhvillimin profesional dhe mirëqenien sociale të studentëve.

8. Si e bashkoni arsimin me artin dhe shëndetin mendor në rolin tuaj si Ambasadore Globale e Wellness?

Përgjigje.

Arsimi duhet të sigurojë mirëqenie shpirtërore dhe materiale, sepse asnjë mësues apo student nuk mund të japë më të mirën nëse nuk është i plotësuar emocionalisht. Mësuesi sot duhet të jetë vizionar dhe i gatshëm të ndihmojë nxënësit, duke përfshirë edhe artin dhe shprehjen kreative si mjete fuqizuese.

9. Si ndiheni për vlerësimet ndërkombëtare që keni marrë?

Përgjigje.

Nuk i shikoj si çmime personale, por si rezultat të përkushtimit dhe pasionit për mësimdhënien si mision jetësor. Këto nderime janë motivim për të vazhduar punën në shërbim të dijes dhe njerëzimit.

10. Çfarë mesazhi do t’u përcillnit vajzave dhe grave shqiptare që duan të bëhen lidere dhe edukatore?

Përgjigje.

T’i zbulojnë dhe rrezatojnë vlerat e tyre me mirësi, buzëqeshje dhe dashuri. Gratë janë motor i mirëqenies morale dhe materiale në shoqëri dhe duhet të jenë krenare dhe të guximshme në rrugën e tyre.