Arkiva e Marubëve shpallet trashëgimi botërore nga UNESKO.

Arkiva e negativëve, objekteve dhe dokumenteve të Pietro dhe Kel Marubit është shpallur pjesë e Regjistrit Ndërkombëtar të Kujtesës së Botës nga UNESCO, duke hyrë në radhën e trashëgimive më të çmuara të njerëzimit. Lajmi është bërë i ditur nga ministri i Ekonomisë, Kulturës dhe Inovacionit, Blendi Gonxhja, i cili e ka cilësuar këtë si një moment historik për kulturën shqiptare.

“Lajm i jashtëzakonshëm! UNESCO ka shpallur arkivën e Marubëve si pjesë të “Memory of the World International Register!”, shkroi Gonxhja në rrjetet sociale. Ai theksoi se kjo është një pasuri e rrallë fotografike që nga zemra e Shkodrës ka përjetësuar imazhin, jetën, historinë dhe shpirtin e shqiptarëve.

Ky vlerësim ndërkombëtar nuk është vetëm një nderim për dinastinë Marubi, e cila hodhi themelet e fotografisë shqiptare, por edhe për qytetin e Shkodrës, që mbetet një epiqendër e artit dhe kulturës kombëtare.

Drejtori i Muzeut Kombëtar të Fotografisë “Marubi”, Luçjan Bedeni, e përshkroi këtë si një lajm të madh për trashëgiminë kulturore shqiptare dhe një hap të madh për vendosjen e gjurmës shqiptare në historinë botërore të fotografisë.

Programi “Memory of the World” i UNESCO-s synon të ruajë dhe promovojë dokumentet më të rëndësishme të historisë njerëzore në mbarë botën. Kjo përfshirje e arkivës Marubi në listën prestigjioze është një dëshmi e vlerës unike që ky fond fotografik përfaqëson për kujtesën kombëtare dhe botërore.

Diaspora