Franka Kukeli – “Vajza me flamur” që përfaqëson krenarinë shqiptare.

Franka Kukeli – “Vajza me flamur” që përfaqëson krenarinë shqiptare

Franka Kukeli banon në Tiranë dhe është një dritë e re e brezit të ardhshëm shqiptar. Ajo ka lindur më 5 shtator 2012 në maternitetin “Koço Gliozheni” në kryeqytet dhe sapo përfundoi klasën e shtatë në shkollën “Fan S. Noli”, ku arriti të gjitha notat 10, duke treguar kështu përkushtimin dhe talentin e saj në studime.

Një moment i veçantë në jetën e Frankës ishte krijimi i një fotografie që lindi nga dëshira për të ruajtur një kujtim të çmuar me kostum popullor, për nder të 28 Nëntorit, ditës së Pavarësisë. Në kuadër të një aktiviteti në shkollë, shoqëria me fotografinë Soela Zani bëri të mundur realizimin e kësaj ideje të bukur. Nëntë shkrepje u bënë për të kapur atë moment të veçantë, por ishte një prej tyre që do të mbetej në zemrat e shqiptarëve, fotografia që Franka e quajti “Vajza me flamur”.

Kjo foto u publikua në Instagram dhe u përhap me shpejtësi, duke u bërë e njohur në të gjithë botën shqiptare. Ajo nuk ishte thjesht një imazh, por një simbol i trashëgimisë dhe krenarisë kulturore. Këtë vit, fotografia fitoi çmimin e parë në konkursin ndërkombëtar "Wanderlust in Albania 2", në kategorinë e trashëgimisë kulturore, duke vënë në pah jo vetëm bukurinë e veshjes tradicionale, por edhe fuqinë e identitetit shqiptar.

Siç thotë Franka,

“Veshja tradicionale është flamuri që nuk valëvitet në erë, por në shpirt.”

Me fjalë të tjera, kjo veshje nuk është vetëm një kostum i bukur, por një dritë që ndriçon të kaluarën dhe të ardhmen e një kombi të tërë. Ajo vetë ndien se

“Kur vesh kostumin popullor, ndiej se mbaj me vete historinë e gjyshërve tanë.”

Bashkëpunimi me fotografinë ishte shumë i frytshëm dhe krijoi një lidhje të veçantë, edhe pse gjatë realizimit të fotos nuk ishte e pranishme mamaja e Frankës, përndryshe emocionet do të ishin më të forta dhe realizimi do të kishte qenë më i vështirë. Por, ky fakt nuk e uli aspak magjinë e momentit.

Ceremonia e ndarjes së çmimeve u zhvillua në një ambient solemne në Pallatin e Brigadave, ku ishin të pranishëm shumë artistë dhe personalitete të njohura të artit dhe kulturës. Momenti i çmimit ishte shumë i bukur dhe la mbresa të pashlyeshme tek Franka dhe të gjithë të pranishmit.

Në një intervistë për Euronews Albania, Franka shprehu me krenari: “Në atë foto nuk isha vetëm unë – ishin mijëra vajza shqiptare që rriten me dashuri për flamurin dhe rrënjët e tyre.

” Ajo beson se “Trashëgimia nuk është vetëm për t’u kujtuar, por për t’u veshur, për t’u ndjerë dhe për t’u jetuar.”

Në fund të ditës, Franka Kukeli nuk është thjesht një vajzë me një fotografi të bukur – ajo është një simbol i gjallë i dashurisë për vendin dhe kulturën e saj, që na kujton të gjithëve se “Nuk ka modë më të bukur se ajo që buron nga zemra e një kombi.”

Pergatiti: Liliana Pere.