Ansambli Popullor pas festivalit të Varnës vazhdon turin me koncerte nëpër qytetet e tjera të vendit

Ansambli Popullor pas festivalit të Varnës vazhdon turin me koncerte nëpër qytetet e tjera të vendit

Nga Julia Vrapi

Ansambli Kombëtar i Këngëve dhe Valleve Popullore u cilësua si më i miri nga komisioni i Festivalit Ndërkombëtar Folklorik të Varnës në Bullgari, por këtë muaj vazhdon turin e kalendarit veror me koncerte nëpër qytete të ndryshme të vendit tonë.Festivali Ndërkombëtar Folklorik i Varnës në Bullgari këtë vit shënoi edicionin e 32-të dhe Ansambli Popullor ishte dhe përfaqësimi i Shqipërisë. Festivali në Varna mblodhi së bashku kulturat e shteteve të ndryshme në disa net spektakli dhe performancash. Teatri Kombëtar i Operës, Baletit dhe Ansamblit Popullor shprehet se nën drejtimin e spalës së orkestrës së Ansamblit, Alban Tahiri, për katër ditë radhazi, artistët shpalosën trashëgiminë tonë jomateriale, duke ngritur në piedestal kulturën shqiptare me muzikën, këngët dhe vallet popullore që nga veriu e gjer në jug, ndërsa shton se artistët nuk do të ndalen me kaq këtë sezon vere.

“Për kënaqësinë e qytetarëve dhe turistëve, Ansambli Popullor do të jetë gjatë gjithë gushtit me koncerte në disa nga qytetet kryesore shqiptare. Skena vjen tek ju dhe sjell ansamblin me vete”, thotëTeatri Kombëtar i Operës, Baletit dhe Ansamblit Popullor (TKOBAP). Pjesëmarrësit e huaj të këtij viti në festivalin e Varnës ishin shtete si Ukraina, Sllovakia, Mali i Zi, Hungaria, Gjeorgjia, Shqipëria, etj. Bullgaria në këtë festival përfaqësohej nga Ansambli Folklorik i Varnës dhe Ansambli i Këngëve dhe Valleve Popullore “Odessos”. Festivali Folklorik Ndërkombëtar i Varnës filloi në vitin 1992 me iniciativën e komunës së Varnës, e cila është organizatori kryesor i tij.

Ansambli me koncerte brenda dhe jashtë vendit

Ansambli pas festivalit të Varnës vazhdon turin e kalendarit veror mekoncert më 18 gusht në Durrës, 20 gusht në Gjirokastër, 21 gusht në Sarandë dhe 22 gusht në Vlorë. Ansambli i Kombëtar Këngëve e Valleve Popullore përbëhet nga solistët këngëtarë, orkestrina, grupi i valleve dhe kori. Ansambli në aktivitetin etij është pjesë e koncerteve të ndryshme brenda dhe jashtë vendit, por nuk mungon dhe pjesëmarrja në festivale ndërkombëtare të folklorit siç ishte dhe ky i Varnës në Bullgari. Nëpër koncertet e ndryshme që japin artistët e ansamblit përzgjidhet një program i pasur muzikor. Ansambli Shtetëror, është krijuar në vitin 1957 si ansambël profesionist. Qëllimi i AKKVP është në përpunimin, zhvillimin dhe përhapjen e thesarit folklorik të Shqipërisë. Këtu përfshihen pasuritë e mëdha folklorike vokale,instrumentale, koreografike dhe kostumografike, që variojnë nga zona në zonë, duke krijuar një koloritet motivesh. Folklori shqiptar shquhet për origjinalitetin, lashtësinë dhe shumëllojshmërinë e gjinive artistike. Zonat e shumta etnografike kanë veçantitë e veta në këngët, vallet, kostumet, ritet e zakonet. Ansambli Kombëtar i Këngëve e Valleve Popullore në aktivitetin e tij ka zhvilluar dhe koncerte në nderim të artistëve të njohur, që kanë dhënë një kontribut të madh ndër vite si pjesë e tij.