Festivali i 63-të i Këngës në RTSH, nga 85 krijime muzikore përzgjidhen 30 këngë në konkurrim

Festivali i 63-të i Këngës në RTSH, nga 85 krijime muzikore përzgjidhen 30 këngë në konkurrim

Festivali i 63-të i Këngës në RTSH, nga 85 krijime muzikore përzgjidhen 30 këngë në konkurrim

Nga Julia Vrapi

Festivali i Këngës në Radio Televizionin Shqiptar këtë vit ka në konkurrim 30 këngë. Festivali i Këngës në RTSH vjen në edicionin e tij të 63-të dhe në skenë pritet të ngjiten Elvana Gjata, Devis Xherahu, Gjergj Kaçinari, grupi “Djemtë e detit”, etj, ku do të jetë sërish rikthimi i këngëtarit Mal Retkoceri, që ishte dhe fitues i edicionit të 62-të që u zhvillua në dhjetor 2023. Lista me këngëtarët që do të jenë pjesë e Festivalit të Këngës në RTSH u publikua një ditë më parë. Komisioni Përzgjedhës për Kualifikimin e Këngëve pjesëmarrëse në Festivalin e 63-të të Këngës në RTSH përzgjodhi 30 këngët për këtë edicionin, që do të zhvillohet në muajin dhjetor këtë vit.

“Komisioni i përbërë nga profesionistë të fushës së muzikës dhe të letrave, pasi dëgjuan e analizuan 85 krijime muzikore, që mbërritën në Radiotelevizionin Shqiptar konform rregullores së festivalit, kanë vendosur unanimisht të shpallin 30 këngët që do të jenë pretendente për çmimet e këtij festivali, pa diskutim edhe pretendente për të përfaqësuar Shqipërinë në Eurovizion”, thuhet për përzgjedhjen e këngëve në faqen “Eurovision Albania”, ku është publikuar dhe lista e këngëtarëve që do të garojnë në edicionin e 63-të. Në festival në konkurrim janë: Algert Sala, Alis Kallacej, Ardit Çuni, Devis Xherahu, Djemtë e Detit, Elvana Gjata, Endrik Beba, Epos Grup, Erma Mici, Frensi Revania, Gjergj Kaçinari, Gresa Gjocera, Jet Kejsi Jazxhi, Kleansa Susaj, Laurjan Ejlli ft. Adelina Corraj, Lorenc Hasrama, Luna Çausholli, Mal Retkoceri, Martina Serreqi, Mihallaq Andrea, Nita Latifi, Olsi Bylyku, Orgesa Zaimi, Rea Nuhu, Ronaldo Mesuli, Santino De Bartolo, Shkodra Elektronike, Stine, Vesa Smolica.

Festivali në RTSH

Festivali i Këngës në RTSH këtë vit zhvillon edicionin e tij të 63-të, por këngëtarja Elhaida Dani u prezantua disa muaj më parë si drejtore artistike. Për pjesëmarrjen në garën seleksionuese të Festivalit të 63- të të Këngës në RTSH më parë u njoftua se krijimet (këngët) duhet të dorëzoheshin në e-mailin zyrtar të festivalit në datat 27- 28 dhe 29 shtator, ku ndër të tjera kompozitorit i lejohej që të prezantonte në festival vetëm 1këngë. Festivali organizohet në çdo fund viti në Pallatin e Kongreseve në Tiranë, ku në të marrin pjesë këngëtarë të rinj dhe këngëtarë të afirmuar. Mal Retkoceri u shpall fitues i çmimit të parë nga juria në Festivalin e 62 të Këngës në RTSH me këngën “Çmendur”, ndërsa Besa Kokëdhima përfaqësoi Shqipërinë në “Eurovision 2024” me këngën “Zemrën n’dorë”.

Ky përfaqësim erdhi pasi mori votat e publikut për të përfaqësuar vendin tonë në edicionin e 68-të të “Eurovision” që u mbajt në Malmo të Suedisë. Festivali i Këngës në RTSH zhvillohet përgjatë disa netëve për publikun. Festivali i Këngës në RTSH është një garë vjetore muzikore në Shqipëri e organizuar nga transmetuesi publik, Radio Televizioni Shqiptar (RTSH). I transmetuar çdo vit që prej inaugurimit në 1962, festivali ka përcaktuar përfaqësuesin shqiptar në “Eurovision” që nga viti 2004.