“Folk on tour” për të sjellë një pjesë nga
Folklori ynë me këngët dhe vallet popullore do të vijë nga artistët e Ansamblit Kombëtar të Këngëve dhe Valleve Popullore. Në vijim të aktivitetit artistik, Ansambli Popullor do të sjellë një tjetër koncert këtë sezon veror. Artistët janë sot në qytetin e Pogradecit, për të përcjellë një program të pasur artistik për të pranishmit. Teatri Kombëtar i Operës, Baletit dhe Ansamblit Popullor shprehet se artistët do t’i japin gjallëri me koncertin e tyre qytetit të Pogradecit. Ky koncert vjen në vijim në aktivitetit të Ansamblit Popullor, ku TKOB shprehet se “Folk on tour” synon të përcjellë te publiku krijimtarinë tonë folklorike. “Artistët e Ansamblit Popullor të TKOB-së sjellin një buqetë me këngë e valle për të gjithë artdashësit e Pogradecit dhe jo vetëm. “Vallja e Fajës”, “Dueti Tiranës”, “Vallja e Shupalit”, “Dil të shoh me sy”, “Vitori t’u bëftë nëna”, “Në moshën e pjekurisë”, janë vetëm disa nga titujt e këngëve dhe valleve që përmban programi artistik që do t’u japë më shumë gjallëri netëve të bukura të qershorit. “Folk on tour” synon të sjellë pranë publikut një pjesë nga krijimtaria e folklorit tonë të pasur me këngë, valle e kostume popullore, duke promovuar trashëgiminë kulturore”, thuhet nga Teatri Kombëtar i Operës dhe Baletit për koncertin. Koncerti zhvillohet sot te sheshi “Odeoni” në Pogradec, në kuadër të aktiviteteve të organizuara për sezonin turistik verë 2024.
Ansambli dhe koncertet në aktivitetin artistik
Koncerti që zhvillohet në qytetin e Pogradecit me artistët e Ansamblit Kombëtar të Këngëve dhe Valleve Popullore vjen pas atij që u zhvillua më parë në kalanë e Krujës. Ashtu si dhe për koncertin në qytetin e Pogradecit, edhe në Krujë programi artistik i Ansamblit Popullor përmbante pjesë të zgjedhura, si këngët “Fustanin që ta solla mbrëmë”, “Bash zaman, o bylbyl”, “Kur më zbret nga Voskopoja”, “Lule t’bukura ka Tirona”. Nuk munguan në Krujë as vallet, si “Dueti i Tiranës”, “Valle pogonishte” e plot të tjera. Më parë gjatë veprimtarisë së Ansamblit Popullor përmendim edhe koncertin “Mbretëresha e valles shqipe”, që erdhi në skenën e Teatrit Kombëtar të Operës dhe Baletit në kujtim të valltares Lili Cingu “Mjeshtre e Madhe”. Në muajin prill në nder të mjeshtrit të madh të penës dhe polifonisë së jugut Lefter Çipa "Nderi i Kombit", Ansambli i Këngëve dhe Valleve Popullore solli koncertin “Këngët e atdheut tim”. Ansambli i Këngëve e Valleve Popullore (AKVP) ose Ansambli Shtetëror, është krijuar në vitin 1957 si ansambël profesionist. Ky ansambël përbëhet nga solistët këngëtarë, orkestrina, grupi i valleve dhe kori. Qëllimi i AKVP-së është në përpunimin, zhvillimin dhe përhapjen e thesarit folklorik të Shqipërisë. Këtu përfshihen pasuritë e mëdha folklorike vokale, instrumentale, koreografike dhe kostumografike, që variojnë nga zona në zonë, duke krijuar një koloritet motivesh. Folklori shqiptar shquhet për origjinalitetin, lashtësinë dhe shumëllojshmërinë e gjinive artistike. Zonat e shumta etnografike kanë veçantitë e veta në këngët, vallet, kostumet, ritet e zakonet.SHKRUAR NGA JULIA VRAPI