Jolie: Gjatë xhirimeve të filmit “Maria” fëmijët e mi e panë dhimbjen brenda meje
Angelina Jolie në rolin e Maria Callasit
Përktheu: Vita Abrashi-Kajtazi
19 dhjetor 2024 09:30
Shpërndaje në:
Aktorja e njohur, Angelina Jolie ka folur hapur për eksperiencën e saj gjatë xhirimeve të filmit “Maria”, i cili është biografi për këngëtaren e njohur të operas, Maria Callas.
You can skip this ad in 5
Advertisement
Në intervistë për BBC-në, ajo ka theksuar se dy nga djemtë e saj më të mëdhenj, Maddox dhe Pax, të cilët punuan si asistentë në prodhimin e filmit, panë “dhimbjen e saj”, një anë të cilën Jolie ka thënë se nuk e kanë parë më herët.
Ajo ka theksuar se përkundër që zakonisht është diskrete për ndjenjat e saj, ata e panë atë në momente të ndjeshme, pasi roli kërkonte që ajo të shprehte dhimbje të thella, që lidhen me jetën dhe vështirësitë e Callasit.
“Ata nuk e kishin përjetuar kurrë nga afër mënyrën se si unë i shpreh dhimbjet, gjë që zakonisht një prind e fsheh nga fëmijët”, ka thënë Jolie, duke shtuar se pas këtyre momenteve të vështira, ata shpesh e mbështesnin me përqafime ose i sillnin një filxhan çaj.
Jolie gjithashtu ka folur për kërkesat tjera të këtij roli, veçanërisht mësimin e operës. Ajo ka kaluar shtatë muaj trajnime, një periudhë shumë e vështirë që kërkonte kontroll të thellë të frymëmarrjes dhe trupit. Ajo ka shpjegoi se nuk kishte asnjë përvojë të mëparshme në këndimin e operës, por pas këtyre trajnimeve ajo e vlerësoi këtë sfidë si një nga më të vështirat e karrierës së saj.
“Ishte ndoshta një nga fushat ku ndihesha më e pasigurte”, ka thënë ajo, duke shtuar se gjithashtu ishte privilegj që kishte mundësinë të provonte diçka të re, që nuk e kishte bërë më parë.
Djemtë e saj, Maddox dhe Pax, janë shprehur të mrekulluar për profesionalizmin që panë gjatë xhirimeve. Regjisori i filmit, Pablo Larraín, ka thënë se ata ishin “shumë të angazhuar dhe profesionistë” në punën e tyre. Në film, Pax, ka incizuar shumë nga praktikat e këndimit të Jolie-s, duke qenë pranë saj gjatë ditëve më të vështira të trajnimit.
“Është gjithmonë e mirë që fëmijët të shohin mamanë e tyre që nuk e ka të lehtë punën, por shpërthen, lufton, dështon dhe përpiqet përsëri”, ka thënë Jolie, duke shtuar se ky ishte moment shumë i rëndësishëm dhe i bukur për marrëdhënien me fëmijët e saj.
Filmi “Maria”, që tregon jetën e Maria Callas në vitet e fundit të saj, ka marrë kritika të ndryshme, por ka pasur vlerësime për performancën e Jolie-s.
Disa kritikë kanë thënë se ajo është “fascinuese” dhe “i jep Callasit bukuri dhe forcë të brendshme”, ndërsa të tjerë kanë menduar se interpretimi i saj ka pasur ngjyrim të ftohtë dhe ka shfaqur pasiguri. Megjithatë, Jolie ka thënë se opera është art i fuqishëm që e ka mundësinë të lidhet thellë me shpirtin e njeriut dhe se kjo është një nga arsyet pse ky film është kaq i rëndësishëm për të gjithë.
Filmi do të shfaqet në kinematë britanike më 10 janar 2025.
#maria callas#Angelina Jolie#filmi