Manjola Camuset-Trebicka 🇫🇷🇦🇱 Pianiste e talentuar, profesore e përkushtuar, ambasadore e kulturës shqiptare në zemër të Francës.

🇦🇱🇫🇷 Krenarë për artisten franko-shqiptare Manjola Camuset-Trebicka 🇫🇷🇦🇱

Pianiste e talentuar, profesore e përkushtuar, ambasadore e kulturës shqiptare në zemër të Francës.

🌟 Rrënjët shqiptare dhe dashuria për pianon

E lindur në Tiranë, në një familje me një emër të madh artistik – vajza e aktorit të paharruar Roland Trebicka – Manjola e gjeti rrugën e saj në botën e artit përmes tingujve të pianos. Muzika nuk ishte vetëm një pasion për të, por një thirrje e brendshme që nisi që në moshën gjashtëvjeçare, duke shënuar fillimet e një rruge të gjatë dhe të ndritur në artin muzikor. U diplomua në Akademinë e Arteve në Tiranë në vitin 1992, duke fituar menjëherë vëmendjen si një ndër talentet më të spikatura të brezit të saj.

🌟 Hapi drejt botës – studimet në Francë

Po atë vit, pas përfundimit të studimeve në Shqipëri, ajo mori pjesë në konkursin prestigjioz të pianos “Marguerite Long” në Paris – një moment kyç që do t’i hapte dyert e një jete të re dhe të një karriere ndërkombëtare. Pas këtij suksesi, ajo vazhdoi studimet në Konservatorin Evropian të Parisit, ku u diplomua me çmimin e parë dhe me përgëzimet e jurisë. Pianistja shqiptare, e ngjitur tashmë në majat e ekselencës, po e vendoste emrin e saj përkrah mjeshtrave të vërtetë të muzikës klasike.

🌟 Një jetë në shërbim të edukimit dhe muzikës

Që prej vitit 1997, Manjola Camuset-Trebicka është pedagoge e pianos në Shkollën e Legjionit të Nderit – një institucion i themeluar nga vetë Napoleon Bonaparti. Ajo jo vetëm që u mëson teknikën e pianos nxënësve të saj, por mbi të gjitha u përcjell dashurinë për artin, disiplinën dhe emocionin e interpretimit. Në këtë shkollë të njohur, ajo krijoi klasën e muzikës së dhomës dhe udhëhoqi me pasion formimin artistik të shumë gjeneratave të reja muzikantësh.

🌟 Dekorime dhe vlerësime nga Franca

Puna e saj e palodhur dhe përkushtimi i vazhdueshëm nuk kanë kaluar pa u vlerësuar. 

✨️✨️✨️Manjola është dekoruar disa herë nga shteti francez: në vitin 2015 u nderua me medaljen prestigjioze “Kalorëse e Palmave Akademike”,

✨️✨️✨️ Medaljen e Kulturës nga qyteti i Neuilly-Plaisance, dhe

 ✨️✨️  me medaljen e lartë të Kalorëses së Urdhrit të Meritës të Republikës Franceze.

 Tre dekorata të mëdha që tregojnë qartë peshën e saj si artiste dhe pedagoge në jetën kulturore të Francës.

🌟 Aktivizmi dhe ambasadorja e kulturës shqiptare

Përtej skenave koncertore dhe mjediseve akademike,

Manjola ka qenë gjithmonë e lidhur me rrënjët e saj. Ajo është një zë i fuqishëm i diasporës shqiptare në Francë, duke promovuar kulturën dhe vlerat shqiptare përmes koncerteve, eventeve dhe angazhimit të saj si aktiviste. 

Ka qenë pjesë e jurive të konkurseve ndërkombëtare si “Golden Key Piano Competition” dhe ka bashkëpunuar me artistë të mëdhenj shqiptarë e ndërkombëtarë, përfshirë Inva Mulën dhe violinistin Philippe Graffin.

🌟 Një frymëzim për brezat e ardhshëm

Rruga e saj është dëshmi se talenti, puna dhe përkushtimi mund të thyejnë çdo kufi. Nga Tirana në Paris, nga një vajzë që ushtronte orë të tëra mbi tastierë në Shqipëri, në një profesore e nderuar nga shteti francez, Manjola Camuset-Trebicka është një histori suksesi që frymëzon, një model për të rinjtë shqiptarë që duan të ecin përpara me art, me dinjitet dhe me dashuri për vendin e tyre.

🎖 Krenarë për ty, Manjola!

Një shqiptare që nderon emrin e saj në Francë, një franceze që kurrë nuk harron Shqipërinë.

Një pianiste që me çdo goditje të tastierës flet me zemër për të dyja atdhetë e saj.

Pergatiti: Liliana Pere