Muzeu etnografik në Gjirokastër përfaqëson një atraksion me identitet të dyfishtë.

Muzeu etnografik në Gjirokastër përfaqëson një atraksion me identitet të dyfishtë. Ai njihet si një objekt që koleksionon pasuri të rralla të traditës materiale etnografike por njëkohësisht edhe si shtëpia e lindjes së Enver Hoxhës, figurës që u bë fytyra e diktaturës më të egër në Europë. I restauruar dy vite më parë muzeu është risjellë me një qasje të re për vizitorët qasje e orientuar nga teknologjia. Këtë sezon më shumë se 10 mijë vizitorë në 80% të tyre të huaj e vizituan këtë muze.

Muzeu Etnografik

/ Qyteti i Gjirokastrës, Shqipëri

Muzeu Etnografik ndodhet në lagjen Palorto. Diktatori i ndjerë Enver Hoxha pretendonte se kishte lindur në vitin 1908 në shtëpinë mbi rrënojat e së cilës ishte ngritur ndërtesa aktuale në vitet 1964-1966. Deri më sot nuk ka asnjë provë për të vërtetuar këtë fakt.

Shtëpia u rindërtua si model i shtëpive më të pasura gjirokastrite. Nga viti 1966 deri në vitin 1991 ndërtesa shërbeu si Muzeu Antifashist. Sipas burimeve vendase, shtëpia origjinale e Enver Hoxhës ishte një kat dhe një oxhak, në krahasim me shtëpinë ngjitur me Skendulajt. Shtëpia e re kopjoi elementë nga shtëpitë më të mira të qytetit, madje shumë objekte u morën prej tyre. Edhe pse i identifikuar si shtëpia e diktatorit, brenda nuk gjen asgjë të përbashkët me jetën e tij apo me sendet e familjes së tij. Edhe dekori i shtëpisë është kopjuar nga shtëpi të tjera të bukura të shekullit të 19-të dhe objektet (reliktet) përfaqësojnë mënyrën se si kanë jetuar njerëzit e pasur në Gjirokastër në shekullin e 19-të. Ndërtesa ka 4 kate të gjitha të hapura për publikun.