Aurela Anastasi; Kopshti botanik si çeshtje e lirisë së kërkimit shkencor.

.

Ky shkrim është një analizë paraprake e vendimit të Gjykatës Administrative të shkallës së parë Tiranë, midis Universitetit të Tiranës dhe Bashkisë Tiranë, në lidhje me pronësinë e Kopshtit Botanik të Universitetit të Tiranës. Qëllimi i tij është që jo vetëm të bëjë të njohur këtë vendim gjyqësor, i cili është pari precedent në këtë fushë, por të qasë çështjen e pronësisë së universiteteve me autonominë universitare dhe lirinë e kërkimit shkencor. Punimi është paraprak, në kuptimin që do të plotësohet nga momenti që do të kemi një vendim gjyqësor të formës së prerë për këtë çështje gjyqësore, e cila është ende në gjykim. Kopshti Botanik i Universitetit të Tiranës (UT), është e vetmja qendër kërkimore shkencore e këtij lloji në vendin tonë. Ai është një produkt i veprimtarisë të pedagogëve dhe studentëve të Universitetit të Tiranës dhe ka në inventarin e tij mijëra bimë endemike, bimë që gjenden vetëm në këtë njësi. Por, prej disa vitesh çështja e pronësisë së tij i është nënshtruar shqyrtimit gjyqësor. Pasi gjykata administrative e shkallës së parë, vendosi të shfuqizojë Vendimin e Këshillit të Ministrave (VKM-në) që i transferonte Bashkisë Tiranë pronësinë mbi të, pritet vendimi i formës së prerë nga gjykata administrative e Apelit. Pavarësisht nga kjo, Kryetari i Bashkisë, Tiranë, u shpreh në mediat vizive se, “Pasi të mbarojmë te Kopshti Zoologjik, duam të vazhdojmë te Kopshti Botanik dhe të sigurohemi që, më në fund, të gjitha hapësirat publike të Tiranës të jenë transformuar”. Deri tani nuk është paraqitur ndonjë plan paraprak apo ndonjë projekt që të na tregojë se çfarë kuptojmë me synimin e Bashkisë për transformimin e hapësirës së Kopshtit Botanik. Po ashtu, nuk ka ndonjë të dhënë nëse po zhvillohen bisedime midis Universitetit të Tiranës dhe Bashkisë, për ndonjë marrëveshje të mundshme midis tyre. Porse, është e rëndësishme të shohim se çfarë na dikton ligji dhe vendimi i gjykatës për këtë çështje. Vendimi i gjykatës administrative të shkallës së parë, deri tani, është i vetmi precedent gjyqësor që bën një interpretim ligjor për këtë çështje. Ky interpretim qartëson se si ajo lidhet ngushtë me parimin e autonomisë universitare dhe atë të lirisë akademike {Nr.Vendimi.1426.(80-2021-1447), Dt.07.05.2021}. Arsyetimi i thelluar në mbështetje të këtyre parimeve, e bën këtë vendim një precedent që duhet të mbahet në vëmendje nga të gjitha institucionet që janë palë në këtë proces gjyqësor. Prandaj, çdo përpjekje për të anashkaluar kuptimet e vendosura prej tij, mbart rrezikun për shkeljen e tyre.

Aurela Anastasi

© 2008-2024 ResearchGate GmbH. All rights reserved.